專業人士話你知：只減脂，不增肌，對健康有影響

我哋女生嘅話題總係離不開減肥、修身，好多人會問小編係咪減走脂肪就會瘦？係咪無晒脂肪、瘦就叫健康同靚呢？如果只係減脂，唔增肌又會點？做好核心肌肉訓練就減到肥？其實除咗唔知減肥效果係咪成功之外，最怕係影響到身體嘅健康。今次我哋搵嚟浸會大學健康科學學科統籌潘宛芬博士同我哋一齊分享下應該點樣可以有效而健康咁管理自己體重啦！

M：More

P：潘宛芬博士

M：點解大多數人減肥都會反彈？減肥修身是否代表減去脂肪就可以？

P：坊間好多人減肥嘅方法都係唔正確，例如節食或者攝取少啲卡路里，但係呢一個方法只可能維持一兩個星期，因為好多人堅持唔到太長久，所以通常好多人話減肥最後都係會反彈嘅。其實減肥瘦身唔係等於減少脂肪就係可以，因為坊間嘅節食餐單可能只係幫你減咗脂肪或者水分，磅數上好似明顯減咗幾磅，但係其實咁唔係長遠嘅方法，反而係要同時維持我哋肌肉，增肌同時減脂。肌肉對身體亦都係好緊要，我哋嘅肌肉其實係燃燒緊我哋嘅卡路里變成能量，只係減少咗水分同埋脂粉只係短期嘅效果。

M：如果只消脂對健康有咩影響？

P：只係消脂對健康係有一定嘅影響，因為我哋身體係唔可以缺少脂肪，例如好多食物都係有一啲有益嘅營養或者係維他命，有啲人會選擇節食消脂，但節食令我哋吸收少咗某啲營養或者係維他命。而有啲食物係有水溶性以及脂溶性嘅物質，如果我哋缺乏咗脂肪就好難吸收到呢類物質，影響健康。

M：如果想好好管理自己體重，或者想增肌減脂，該從何入手？可以講解一下肌肉對管理體重的重要性？

P：我哋平時要飲食均勻，以及適量嘅運動加上足夠睡眠，鍛鍊好我哋嘅肌肉就可以好容易管理我哋嘅體重，做好增肌同減脂。運動可以令到我哋嘅肌肉代謝消脂，特別係帶氧運動對心肺更加好。如果想加強肌肉嘅代謝燃燒，最好做一啲負重運動，例如舉重、舉啞鈴，另外核心肌肉訓練都可以有助消脂，而且訓練核心肌肉，可以令身體協調性更好，身體線條都會更美好，但係就要視乎身高體重去做運動，最好要有專業人士幫你計算

肌肉係幫我哋身體做代謝嘅工作，當我哋從食物一邊攝取咗好多不同嘅營養，營養係提供能量俾我哋身體，我哋點樣去運用就係要靠肌肉去運作，鍛鍊好肌肉就可以健康而長久管理我哋體重。

小編聽完潘宛芬博士分享完都真係唔敢立亂搵偏方減肥，亦唔好亂信坊間嘅修⾝⽅法只識去減走脂肪，反而係要注重多做運動鍛鍊好我哋嘅肌肉最實際！